London,England.
MOJA kati ya swali kuu juzi Jumamosi kwenye mchezo wa ligi kuu England kati ya Liverpool na Arsenal dimbani Anfield lilikuwa ni kwanini Alexis Sanchez alianzia benchi wakati yeye ndiye kinara wa kufumania nyavu pale Emirates na huku ikifahamika kuwa mchezo ule ulikuwa ni muhimu sana kwa washika mitutu wa jiji la London?.
Swali hilo limepata jibu!!Ishu iko hivi licha ya kocha wa Arsenal,Arsene Wenger kudai kuwa alimweka benchi Sanchez kwa sababu za kiufundi na kuamua kuwatumia Danny Welbeck na Alex Iwobi kwa madai kuwa alitaka Arsenal icheze 'direct football', imebainika kuwa kocha huyo alitumia benchi kama fimbo ya kumwadhibu Sanchez baada ya staa huyo wa Chile kujiondoa/kususa katikati ya mazoezi kuelekea mchezo dhidi ya Liverpool ulioisha kwa Arsenal kuchapwa mabao 3-1.Sanchez aliingia uwanjani kipindi cha pili Arsenal ikiwa tayari imechapwa mabao 2-o.
Imedaiwa kuwa Sanchez alisusia mazoezi na kuamua kuondoka kabla ya wakati uliopangwa baada ya kupishana kauli na kocha Wenger hali iliyolazimu wachezaji wenzake wamfuate kwenye vyumba vya kubadilishia nguo na kuanza kumkoromea mbovu huku wakimtaka aache ubinafsi na afanye mambo kwa maslahi ya klabu.
Katika siku za hivi karibuni Sanchez amejikuta akikosolewa vibaya mno klabuni Arsenal akidaiwa kuwa mbinafsi hata pale anapotakiwa kufanyiwa mabadiliko uwanjani ili awapishe wenzake waingine kucheza.
Imedaiwa kuwa mapema mwaka huu Sanchez hakufurahia kufanyiwa mabadiliko kumpisha uwanjani Danny Welbeck kwenye mchezo dhidi ya Swansea City licha ya Arsenal kuwa tayari ilikuwa mbele kwa mabao 4-0.
Wakati huohuo habari zinasema kuwa licha ya uwamuzi wa Wenger wa kumpiga benchi Sanchez kuwakera wengi ikiwemo mashabiki wa Arsenal,wachambuzi wabobevu wa soka na wachezaji wa zamani,imebainika kuwa wachezaji wa sasa wa Arsenal wao wanamuunga mkono katika jambo hilo kwa asilimia mia moja.
0 comments:
Post a Comment