FIFA YAMFUNGIA MWAKA MMOJA EMMANUEL EBOUE

Sunderland,England.

Shirikisho la vyama vya soka duniani FIFA limemfungia mwaka mmoja mlinzi Emmanuel Eboue 32 kwa kosa la kushindwa kulipa deni la siku nyingi analodaiwa na wakala wake wa zamani Sebastien Boisseau.

Fifa imefikia hatua hiyo baada ya kamati ya nidhamu ya shirikisho hilo CAS kuutupilia mbali utetezi wa mlinzi huyo wa zamani wa Arsenal na Ivory Coast.

Julai mwaka 2013 FIFA ilimuagiza Eboue kumlipa Boisseau kiasi chote anachodaiwa lakini mlinzi huyo hakutimiza agizo hilo hali iliyofanya alimwe faini ya £21,000 huku akipewa onyo la kukumbana na adhabu kali.

Wakati huohuo Sunderland imetangaza kumtema Eboue zikiwa ni siku 12 zimepita tangu imsajili akiwa kama mchezaji huru baada ya kutemwa na Galatasaray.

Kupitia tovuti yake Sunderland imesema imefikia uamuzi huo baada ya kushauriwa na FIFA na kuongeza kuwa Eboue hakusema kama ana kesi FIFA.

Friday, April 01, 2016