Alichokisema Griezmann baada ya kudaiwa kuwa na mpango wa kutua Manchester United.

Madrid,Hispania.

STAA wa Atletico Madrid Mfaransa,Antoine Griezmann amesema hana mpango wa kuikacha klabu hiyo katika siku za hivi karibuni na kuongeza kuwa maswali ya mara kwa mara juu ya yeye kutaka kwenda Manchester United ama la yanachosha na yanaboa.

Akifanya mahojiano na kitua cha Televisheni cha Hispania cha TVE Telediario de La1,Griezmann,25,amesema amejifunza mengi akiwa na Atletico Madrid.Ana marafiki wazuri kikosini na kocha bora.Ana furaha kubwa kuvaa jezi ya Los Colchoneros hivyo hana sababu ya kuondoka na kujiunga na klabu nyingine.

Kauli hiyo ya Griezmann mwenye mkataba na Atletico Madrid mpaka 2021 imekuja baada ya hivi karibuni vilabu vingi vikubwa na tajiri kudaiwa kumfuatilia huku Manchester United ikiripotiwa kuwa tayari kutoa kitita cha €100m ili kuinasa saini yake.

Msimu huu Griezmann ameifungia Atletico Madrid mabao 20 katika michezo 37 ya michuano mbalimbali.

Saturday, March 11, 2017