Barcelona, Hispania.
Na Faridi Miraji.
Barcelona tayari wameshaanza mchakato wa kutafuta kocha mpya na ni mashabiki wakubwa sana wa Mauricio Pochettino, kwa mujibu wa mchambuzi wa soka la Hispania kupitia kituo cha Sky Sports, Guillem Balague.
Nguvu zimeshahamia kwa kutafuta mbadala wa Enrique na Guillem amesema kwamba uongozi wa Klabu tayari umeshaandaa orodha ya majina ya makocha.
Kocha wa Sevilla, Jorge Sampaoli ndio anaongoza mbio hizo lakini Balague anaamini kwamba klabu itamuajiri kocha ambaye tayari anaijua klabu au jiji lenyewe.
Kocha wa Everton, Ronald Koeman ambaye alikuwa mchezaji muhimu sana kwenye kikosi cha Johan Cruyff kilichokuwa na mafanikio sana, yeye anashika nafasi ya pili kwenye orodha hiyo, huku Pochettino akiwa anapendwa sana ndani ya Barcelona na jiji kwa ujumla.
Licha ya kwamba amesaini mkataba wa miaka mitano na Spurs, Pochettino aliishi kwa muda wa miaka 10 katika jiji la Barcelona kama mchezaji na kocha wa mahasimu wa Barcelona katika jiji hilo Espanyol na ameripotiwa kwamba bado anamiliki nyumba jijini Barcelona.
"Klabu tayari ina orodha, wameshaongea na makocha hao."
"Wameshawaambia makocha ambao tayari wapo kazini na wengine ambao wapo mwishoni mwa mikataba yao. Baadhi yao nina uhakika tayari wameshapigiwa simu. Ni pamoja na Ernesto Valverde na Laurent Blanc"
"Najua kwamba Pochettino ana mashabiki wengi Barcelona."
"Jorge Sampaoli anazidi kujiongeza lakini kila wakati nikiiuliza klabu wanasema Sampaoli sio kocha wanaomuhitaji kwasababu wanahitaji kocha anayeielewa klabu, ambaye amewahi kucheza pale au amewahi kuwa karibu sana na klabu. Kuna kutajwa kwa jina la Koeman, Eusebio Sacristan siku za hivi karibuni aliongeza mkataba mpya katika klabu yake ya Real Sociedad."
"Juu ya orodha hiyo huenda akawa Laurent Blanc au Ernesto Valverde."
0 comments:
Post a Comment