Neymar ashauriwa kubadili jina ili aweze kutwaa tuzo ya mchezaji bora wa dunia

New York,Marekani.

STAA wa Brazil na mshindi mara moja wa tuzo ya mchezaji bora wa dunia, Ricardo Izecson dos Santos Leite maarufu kama Kaka ametania kwamba Staa wa Barcelona,Neymar anapaswa abadilishe jina lake na kuwa ‘Reymar’ kwa kuwa mastaa wote wakali wa Brazil waliowahi kuwa bora duniani majina yao yanaanzia na herufi ‘R’.

Akiongea na kituo cha Televisheni cha Record, Kaka amesema licha ya Neymar kuwa na kiwango bora sana cha uchezaji lakini kuna kitu kimoja tu anachopaswa kufanya ili aweze kutwaa uchezaji bora wa dunia na kitu hicho si kingine bali ni kuondoa herufi N' mwanzoni mwa jina lake na kuweka herufi R' ili mambo yake yawe supa.

Kaka,34,ambaye kwa sasa anaichezea Orlando City ya Marekani amejikita kwenye imani kuwa Wabrazil wote waliotwaa uchezaji bora wa dunia kama Ronaldinho, Ronaldo na Rivaldo wote majina yao yanaanzia na herufi ‘R’ hivyo Neymar anapaswa ajifananishe nao kwa njia ya kubadili herufi ya kwanza ya jina lake.

Kaka ameongeza kwa kiwango anachoendelea kukionyesha Neymar kwa sasa klabuni Barcelona kinamweka karibu zaidi nyota huyo na tuzo ya mchezaji bora wa dunia.

Sunday, March 12, 2017