Mshambuliaji wa Zanako Aionya Yanga

Na Faridi Miraji.                                            

Mshambuliaji hatari wa Zanaco, Fashion Sakala jana alituma salamu kwa Yanga baada ya kuifungia mabao mawili timu ya taifa ya Zambia ya vijana wenye umri chini ya miaka 20 katika ushindi wa mabao 6-1 dhidi ya Mali kwenye mchezo wa michuano ya Kombe la Mataifa ya Afrika kwa vijana wenye umri chini ya miaka 20.

Sakala maarufu kwa jina lake la kwanza la Fashion alifunga mabao hayo mawili dakika ya 8 na 66  na kumfanya kuwa nyuma ya kinara Luther Singh wa Afrika Kusini mwenye mabao matatu.

Akiwa na umri wa miaka 19 tu tayari anatatajwa kuwa mmoja wa washambuliaji watakaojenga kikosi kipya cha Zambia. Alikuwa msaada mkubwa kwa Zanaco kuivua taji la Ligi Kuu Zambia klabu ya Zesco United kwa kufunga mabao kumi msimu uliopita.

Ni mfungaji bora wa michuano ya COSAFA U-20 iliyopita huku akiwa ameshamwaga wino katika klabu ya Spartak Moscow ya Urussi.

Hata hivyo kuna uwezekano mdogo sana wa kucheza pambano la awali dhidi ya Yanga kwani mechi za mshindi wa tatu na fainali za michuano ya Kombe la Mataifa ya Afrika zitachezwa wikiendi moja na mechi za awali za raundi ya kwanza ya Ligi ya Mabingwa Afrika.

Kwa hesabu hizo, Fashion ambaye ni dhahiri amedhihirisha kuwa ni mmoja kati ya wachezaji wanaotakiwa kuchungwa na Yanga anaweza kucheza pambano la marudiano litalopigwa huko Zambia kati ya tarehe 17-19 Machi.

Thursday, March 02, 2017