Serengeti Boys yawasili salama nchini Morocco

Casablanca,Morocco.

TIMU ya taifa ya Tanzania ya vijana chini ya miaka 17,Serengeti Boys imewasili salama jioni ya leo huko Casablanca nchini Morocco.

Kocha mkuu wa timu hiyo,Bakari Shime "Mchawi Mweusi" amesema vijana wake wamewasili salama kwenye mji wa Casablanca ambapo baada ya mapumziko ya muda mfupi watasafiri kwa basi kwa umbali wa masaa mawili kuelekea katika mji wa Rabat ambako wataweka kambi ya wiki tatu kujiwinda na michuano ya vijana ya Afrika,AFCON itakayoanza Mei 14 huko nchini Gabon.

Shime ameongeza kuwa baada ya kufika mjini Rabat vijana hao watapewa mapumziko mafupi ili kupunguza uchovu wa safari kabla ya Ijumaa jioni kuanza programu yao ya mazoezi.

Ikiwa mjini Rabat,mbali ya kufanya mazoezi pia Serengeti Boys itapata nafasi ya kucheza michezo kadhaa ya kirafiki ya kimataifa dhidi ya mataifa ya Misri na Morocco.

Serengeti Boys iliondoka nchini jana Jumatano saa 10:15 jioni kwa ndege ya shirika la ndege la Emirates ikipitia Dubai,Falme za Kiarabu kabla ya jioni ya leo kuwasili nchini Morocco.

Thursday, April 06, 2017