PENATI YA SANCHEZ YAMCHEFUA WENGER APANGA KUMUWEKA KITIMOTO

London, Uingereza.

MENEJA wa Arsenal Mfaransa Arsene Wenger ameonyesha kuwa siyo mtu wa mchezo mchezo hata kidogo hasa linapokuja suala la maagizo anayotoa kwa wachezaji wake kupuuzwa kwa sababu yoyote ile. 

Ishu iko hivi!!Wenger amepanga kumweka kitimoto winga wake Alexis Sanchez na kuhoji ni kwanini alichukua jukumu la kupiga penati katika mchezo wa jana Jumamosi wa ligi kuu dhidi ya Hull City wakati jukumu hilo ni la kiungo Santi Cazorla

Akifanya mahojiano na shirika la habari la Uingereza (BBC),Wenger, amesema jukumu la kupiga penati Arsenal liko mikononi mwa Santi Cazorla sasa anashangaa kwanini Sanchez alichukua jukumu la kupiga penati ile ambayo ilipanguliwa na kipa wa Hull City,Eldin Jakupovic.

Wenger amesisitiza kuwa kukosa penati ni jambo la kawaida lakini anataka kujua kama Cazorla ambaye ndiye mpigani namba moja wa penati za klabu hiyo hakutaki kupiga penati ile ama Sanchez alinga'ang'ania.

Licha ya kukosa penati katika mchezo huo lakini Sanchez alifunga mabao mawili na kuiwezesha Arsenal kushinda mabao 4-1 dhidi ya Hull City katika uwanja wa KCOM Stadium.

Sunday, September 18, 2016