JASON NONO MAYELE:MCONGO WA CHIEVO ALIYEKUFA AKILIWAHI BASI LA KLABU

KUMBUKUMBU MICHEZONI

Imeandaliwa na Paul Manjale

0717 70 55 48

Jason Mayele huenda siyo jina maarufu sana masikioni na machoni mwa wapenzi wa soka Tanzania kama ilivyo kwa majina mengine ya wachezaji toka Congo DRC kama Lomana LuaLua,Tresor Mputu na wengineo wengi.

Mayele akifanya vitu vyake dimbabi dhidi ya Juventus

Mwili wa Mayele baada ya ajali

Lakini katika jiji la Chievo nchini Italia na Congo kwenyewe Jason Nono Mayele ni mmoja katika ya nyota maarufu na wanaoheshimika zaidi kila inapoitwa leo,siyo tu kwasababu ya kifo chake bali pia kwa mchango wake kwa klabu yake ya Chievo na timu yake ya taifa ya Congo.

Je,Jason Mayele ni nani?

Jason Nono Mayele kama anavyofahamika zaidi katika mitaa mingi ya Bussolengo,Italia na Congo alizaliwa tarehe 4 januari 1976 huko Kinshasa na kufariki tarehe 2 machi 2002 huko Bussolengo Italia.

Kabla ya kifo chake Mayele aliyemudu kucheza vyema nafasi za ushambuliaji na winga alifanikiwa kuchezea kwa mafanikio vilabu vya Brunoy (1991-1993),LB Chateauroux ya Ufaransa (1993-1999),Cagliari (1999-2001) na mwisho Chievo (2001-2002).

Kifo chake

Mayele aliyekuwa mmoja kati ya nyota wa Chievo walioweka rekodi ya kuipeleka klabu hiyo katika michuano ya Ulaya katika msimu wake wa kwanza tu katika ligi ya Seria A alifariki akiwa na miaka 26 katika ajari mbaya ya gari.

Gari alilokuwemo Jason Mayele likiwa limeharibika vibaya

Mayele aliyekuwa akiliwahi basi la klabu yake la Chievo kwa ajili ya kwenda kwenye mchezo wa ugenini wa ligi ya Seria A dhidi ya klabu ya Parma, gari dogo alilokuwa akilitumia liligongana uso kwa uso na gari jingine na kukatisha uhai wa nyota huyo kutokana na majeraha makubwa aliyoyapata katika sehemu mbalimbali za mwili wake wakati akiwahishwa hospitali ya karibu katika mji wa Verona.

Jezi yake yastaafishwa

Uongozi wa klabu ya Chievo uliamua kuistaafisha jezi no 30 iliyokuwa ikivaliwa na Jason Mayele ili kutoa heshima kwa nyota huyo aliyekufa katika mapambano ya kuitetea klabu hiyo.